वल्र्डलिंकको मुख्य कार्यालयसहित ११ शाखामा छापा

प्रस्तुति: कारोबार संवाददाता

– अवैध ब्यान्डविथ वितरण, आयकर, भ्याट, रोयल्टी, ग्रामीण दूरसञ्चार सेवा शुल्क छली तथा हुन्डीमार्फत रकम विदेश पठाएको आरोप

– सम्पत्ति शुद्धीकरणको आशंकामा एक वर्षदेखि छानबिन जारी

काठमाडौं, ४ पुस - नेपालको दोस्रो इन्टरनेट सेवाप्रदायक वल्र्डलिंक कम्युनिकेसन प्रालिको प्रधान कार्यालयसहित देशभरका ११ शाखामा छापा मारी राजस्व अनुसन्धान विभागले कागजात नियन्त्रणमा लिएको छ । विदेशबाट भिœयाएको इन्टरनेट ब्यान्डविथ अवैध रूपमा वितरण गरेको, राजस्व छलेको, स्वीकृति नलिएरै शाखा विस्तार गरेको लगायतका आरोप वल्र्डलिंकमाथि छन् ।
विभागले बुधबार काठमाडौंको न्युरोड, विराटनगर, लहान, जनकपुर, हेटौंडा, वीरगन्ज, भैरहवा, पोखरा, नेपालगन्ज, धनगढी र ललितपुरमा एकैपटक छापा मारेको हो । छानबिनका लागि भन्दै विभागले कम्पनीको रजिस्टर, ग्राहक सेवाको बिल, भौचर, भर्पाई, कम्प्युटर, ल्यापटप र सर्भरमा रहेको डाटासमेत नियन्त्रणमा लिएको छ ।

कम्पनीले नेपाल दूरसञ्चार प्राधिकरणको स्वीकृति नलिएरै भ्रातृ कम्पनी खडा गरी तिनीहरूलाई इमेल, इन्टरनेट र वेबसाइटको डोमेन वितरण गरेको आशंकामा छापा मारिएको विभागका महानिर्देशक जन्मजय रेग्मीले बताए । “कम्पनीले ब्यान्डविथको अवैध वितरण र खपतबाट अवैध रकम आर्जन गरी हुन्डीमार्फत बाहिर पठाएको र अवैध सम्पत्ति जम्मा गरेको सूचनाका आधारमा कागजात जफत गरेका हौं,” उनले भने ।
विभागका अनुसार कम्पनीले मूल्य अभिवृद्धि कर (भ्याट), आयकर, ग्रामीण दूरसञ्चार सेवा शुल्क र रोयल्टीसमेत छलेको छ । कम्पनी मनोज अग्रवाल, दिलीप अग्रवाल र विजयकुमार जलानको नाममा रहेको विभागले जनाएको छ । कम्पनीका अध्यक्ष दिलीप हुन् ।
विभाग निर्देशक भरतराज सुवेदीको नेतृत्व र क्षेत्रीय प्रमुखहरूको संलग्नतामा देशभर छापा मारिएको हो । राजस्व अनुसन्धान सशस्त्र प्रहरी बलसमेत परिचालन गरिएको थियो । कम्पनीको व्यवसायमा कुनै असर नपर्ने गरी कागजात जफत गरिएको रेग्मीले बताए ।
छापा मार्नुअघि उजुरी र सुराकीमाथि विस्तृत अध्ययन गरिएको जानकारी उनले दिए । विभागले कम्पनीका सञ्चालकलाई आउँदो शुक्रबार सोधपुछका लागि बोलाएको छ ।
कम्पनीले अवैध रूपमा सम्पत्ति आर्जन गरेको र तिनको स्रोत नखुलेको सूचनाका आधारमा एक वर्षदेखि सम्पत्ति शुद्धीकरण अनुसन्धान विभागमा पनि अनुसन्धान चलिरहेको छ । भ्वाइसओभर इन्टरनेट प्रोटोकल (भीओआईपी) मार्फत कल बाइपास गरेको आरोपमा प्रहरीले एक वर्षअघि वल्र्डलिंकमा छापा मारेको थियो । प्रहरीले उक्त मुद्दालाई थप अनुसन्धानका लागि विभाग पठाएको हो । विभागले अनुसन्धान जारी रहेको जनाएको छ ।
नेपालमा इन्टरनेट क्षेत्रतर्फ ‘पायोनियर’ मानिने बल्र्डलिंक लाइसेन्स लिने दोस्रो सेवाप्रदायक हो । उसले नेपालका ५८ जिल्लामा इन्टरनेट सेवा विस्तार गरिसकेको छ भने बाँकी जिल्लामा विस्तार प्रक्रिया जारी छ । कम्पनीले सेवा सुरु गरेको यो अठारौं वर्ष  हो । उसको चुक्ता पुँजी ६ करोड रुपैयाँभन्दा धेरै छ । ५.२ गिगाहर्जमा सेवा दिने वल्र्डलिंकले नै ब्रोडब्यान्ड इन्टरनेट भिœयाएको हो ।