निशा अधिकारी छाउपडी प्रथाबिरुद्धको अभियानमा लाग्ने

पोष्ट गर्ने - मुकुन्द ढुंगाना ,काठमाडौं

 काठमाडौं, जेठ १५ - सगरमाथाको आरोहण गरेर फर्किएकी नायिका निशा अधिकारीले आरोहणको क्रममा भएको एउटा गोप्य कुरा सार्वजनिक गरेकी छिन् ।सगरमाथा आरोहण गरेर फर्किएका अधिकारी र नायक अर्जुन कार्कीको सम्मानमा वुधवार भएको कार्यक्रममा निशाले सगरमाथा चढ्नुअघि आफूलाई महिनावारी भएको गोप्यता खोलेकी हुन् ।आफ्नो सगरमाथा आरोहणलाई महिला शसक्तिकरणसँग जोड्दै उनले भनिन् “नारीलाई प्रकृति र भगवानले कुनै पनि बिभेद गरेका छैनन्, विभेदको वातावरण हामी आफैंले सृजना गरेको हो ।” महिनावारी भएको बेलामा समेत आफू सगरमाथा शिखरमा पुगेको जानकारी दिँदै नायिकाले आगामी दिनमा छाउपडी प्रथाबिरुद्धको अभियानमा लाग्ने उद्घोष गरिन् ।

सगरमाथाको शिखर चुम्न सफल भएकोमा निकै खुशी देखिएकी निशाले भनिन, “बाटोमा धेरै जनाको लासलाई हेर्दै अगाडी बढियो, तर जब चुचुरोमा पुगे स्वर्ग पुगे जस्तो लाग्यो ।”
सानैदेखिको आफ्नो इच्छा सगरमाथा चढ्नु रहेको समेत उनले बताईन । त्यसका लागि उनले बेला बेला काठमाडौं बाहिर गएर रक क्लाईम्बिङ्गको तालिम समेत लिएकी थिईन । “धेरै मेहनत पछि मेरो इच्छा पुरा भएको छ,” पत्रकार र सञ्चारकर्मीहरुबाट घेरिएकी उनले हँसिलो मुद्रामा भनिरहेकी थिईन् ।
६६ दिनमा सगरमाथाको यात्रा पुरा गरेका नायक अर्जुन कार्कीका अनुसार यात्रा निकै कठिन रहयो । पशुपतिनाथबाट जल लिई हिडेरै सगरमाथातिर लागेका कार्कीको चिसोका कारणले खुट्टामा पनि निकै असर परेको छ । खुट्टाको उपचार भईरहेको उनले जानकारी दिए ।



“बाटोमा साथीहरुले समयमा अक्सिजन नदिएका भए सायद आज म यहाँ हुन्न थिए होला” यात्राको अनुभव सुनाउदै उनले भने, “अक्सिजनको अभावले म मान्छे नै नचिन्ने भएको थिए, रिंगटा लागेर भुईमा ढलेको मेरो ज्यानलाई सम्हाल्दै साथीहरुले अक्सिजन दिएपछि मात्र म बाँचेको हुँ ।”
चुचुरोमा पुगेपछि भने एकछिन संसार नै भुलेको कार्कीको भनाई थियो । कार्कीले सगरमाथाको चुचुरोमा एक मिनेटसम्म टाउकोले टेकेर उभिएको पनि बताए । उनका अनुसार सगरमाथाको चुचुरोमा अहिलेसम्म कसैले टाउकोले टेकेर उभिएका छैनन् ।यो कुरालाई गिनिज बुक अफ बल्र्ड रेकर्डमा नाम लेखाउनको लागि पहल गरिदिन पनि उनले विभिन्न संघसंस्थालाई अनुरोध गरे ।
कहानी नेपाल चलचित्र कलाकार संघले बुधबार आयोजना गरेको सम्मान कार्यक्रममा नायक अर्जुन कार्की र नायिका निशा अधिकारीले आफ्नो सगरमाथासँगको संघर्ष र सफल्ताको कहानी सुनाउँदा सबैजना निकै रोमान्चित देखिन्थे ।