अरनिको यातायात समितिले दसैंमा पाँचसय बस चलाउने

कान्तिपुर संवाददाता
दोलखा, आश्विन १५ - छतमा बसेर यात्रा गर्ने क्रमलाई रोक्न यसपटकको दसैं अवधिभर अरनिको यातायात समितिले दैनिक पाँच सय बस चलाउने भएको छ ।
राजधानीपूर्वका जिल्लाहरुमा यातायात सेवा सञ्चालन गरिरहेको समितिले अरनिको राजमार्ग र साहायक मार्गहरु गरी ४० स्थानमा बस चलाउने पनि जनाएको छ । दोलखा प्रशासन र प्रहरीले दसै अबधिमा हुने दुर्घटनालाई कम गर्न छतमा गरिने यात्रा पूर्णतः बन्देज गर्न कडा कदम चाल्ने भएपछि समितिले प्रयाप्त बस चलाउने बताएको हो ।
राजधानीपूर्वी मार्गहरुमा एकलौटी जस्तै सुविधा दिंदै आएको अरनिकोले कुनै पनि यात्रुलाई सिटबाहेक यात्रा गर्ने अवस्था नल्याउने प्रतिबद्धता पनि जनाएको छ । दोलखाको प्रशासन र प्रहरीसँगको छलफलमा दसैमा यात्रुको चाप हेरेर दैनिक ५ सय बस
चालउने समितिका अध्यक्ष जीतबहादुर भारतीले बताए । समितिले नियमित रुपमा दैनिक २ सय ३२ वटा वसहरु चाउदै आएको छ । उक्त समितिको बसमा काभ्रेपलाञ्चोक, सिन्धुपाल्चोक, दोलखा, रामेछाप, सोलुखुम्वु र ओखलढङ्गाका मानिसहरु अरनिको राजमार्ग हुँदै यात्रा गर्छन् । अरनिको बाहेक लामो दुरीमा सिन्धुपाल्चोकसम्म हेलम्बु र दोलखासम्म रोल्वालिङ यातायाता समितिले बस चलाउदै आएको छ । छलफलमा रोल्वालिङ यातायात सेवा समितिले पनि छतमा यात्रालाई प्रतिबन्ध गर्ने प्रतिबद्धता गरेको छ ।
गैरकानुनी भए पनि साधनको अभावले यात्रुहरु दसैका बेला छतमा बसेर जोखिम यात्रा गर्न बाध्य हुन्छन् । गएको दसैका बेलाहरुमा घटस्थापनाको दिनदेखि यात्रुको चाप बढ्थ्यो र यात्रुहरु छतमा र वसभित्र उभिएर यात्रा गर्न बाध्य हुन्थे । 'यसपटक त्यस्तो अवस्था आउदैन,' अरनिको समिति सचिव श्याम लामाले दसै अबधिभर सिटमै बसेर यात्रा गर्ने बसहरुको व्यवस्था मिलाउने बताए ।
जिल्ला प्रहरी कार्यालय दोलखामा भएको छलफलमा समितिले असोज १ गतेदेखि अगि्रम बुकिङ खुला गरे पनि लामो दूरी मानिने दोलखा र रामेछापका यात्रुहरुले हालसम्म टिकट नकिनेको बताए । चाहेजति टिकटको व्यवस्था भए पनि अगि्रम बुकिङ नभैदिदाँ भने समस्या परेको उनीहरुको भनाइ छ ।
यसपटक दोलखा प्रशासनले पनि कुनै पनि हालतमा यात्रुलाई छतमा वस्न नदिने भएको छ । टिकट नपाएको गुनासो सुन्ने र व्यवस्था गर्न पहल गर्ने तर छतमा यात्रा गरेको पाइएमा कार्वाही गरिने प्रहरी नायव उपरिक्षक सुरेशप्रसाद काफ्लेले बताए । छतमा वस्ने, ढोकामा उभिने र झुण्डिने क्रमलाई रोक्न विशेष कदम चालिने उनले बताए ।
अघिल्लो दसैंहरुमा राजधानीबाट आउने बेला मात्र प्रशस्त वस व्यवस्था गर्ने अरनिकोले यसबर्षदेखि जाने बेलामा पनि चाहिए जति बस व्यवस्था गर्ने भएको छ । दसै पछि पनि क्युबाहेकको बसहरु व्यवस्था गरेर यात्रुलाई सहुलियत दिनुपर्ने छलफलमा माग भए पछि समितिले राजधानी र्फकने यात्रुहरुका लागि पनि चाहे जति बस चलाइदिने प्रतिबद्धता गरेको हो । प्रमुख जिल्ला अधिकारी प्रल्हाद पोखेलले जिल्ला प्रशासनबाट दसै अवधिमा यात्रुको आवागमण सहज बनाउन अनुगमण र कार्वाही प्रकृया निरन्तर गरिने बताए ।
कन्तिपुरबाट साभार